በአምባ ጊዮርጊስ አካባቢ የነበሩ ወታደሮች ጠፉ

መስከረም ፲፫ (አሥራ ሦስት) ቀን ፳፻፱ ዓ/ም ኢሳት ዜና :- ትናንት ለዛሬ አጥቢያ በአምባጊዮርጊስ አካባቢ ጥበቃ ሲያደርጉ ከነበሩት ወታደሮች መካከል በርካታ ወታደሮች ጠፍተው ማደራቸውን የደረሰን መረጃ የመለክታል። ለደህንነት ሲባል ቁጥር እንዳይጠቀስ የጠየቁት የመረጃ ምንጮች፣ ከጠፉት ወታደሮች መካከል አንደኛው ዛሬ  መንገድ ላይ በመያዙ በአሳሽ ወታደሮች ክፉኛ ተደብድቦ ሆስፒታል ገብቷል። ሌሎቹ ግን ማምለጣቸውን ምንጮች ገልጸዋል።

በፍኖተሰላም ሰሞኑን 8 ወታደሮች መጥፋታቸውን መዘገባችን ይታወሳል። በህዝብ ላይ አንተኩስም በማለት አገዛዙን እየተጣሉ የሚሄዱ ወታደሮች መበራከት ገዢው ፓርቲን በእጅጉ በማሳሳቡ ተጨማሪ የወታደር ምልመላ ለማድረግ ማስታወቂያ እያወጣ ነው።

የሚጠፉት ወታደሮች አብዛኞቹ ወደ በረሃ በመሄድ እየታገሉ መሆኑን የሚደርሱን መረጃዎች ያመለክታሉ። ህዝባዊ እምቢተኝነት ከተጀመረበት ጊዜ አንስቶ በአማራ ክልል ብቻ በመቶዎች የሚቆጠሩ ወታደሮች ሳይጠፉ እንዳልቀረ ይገመታል።