አቶ የሽዋስ አሰፋ የርሃብ አድማ አደረገ

መስከረም ፮(ስድስት) ቀን ፳፻፯ ዓ/ም ኢሳት ዜና :-በማዕከላዊ ምርመራ ታስሮ የሚገኘው የሰማያዊ ፓርቲ ምክር ቤት ምክትል ሰብሳቢ  አቶ የሽዋስ አሰፋ የአራት ቀን የርሃብ አድማ

ማድረጉን ነገረ ኢትዮጵያ ዘግቧል። አቶ የሸዋስ ከጳጉሜ 4 ጀምሮ አዲሱን አመት በርሃብ አድማ ያሳለፈ ሲሆን ቅዳሜ መስከረም 3/2007 ዓ.ም ምግብ እንደቀመሰ ባለቤቱ ወይዘሮ

ሙሉ ለነገረ ኢትዮጵያ ገልጻለች፡፡

አቶ የሽዋስ የርሃብ አድማ ያደረገው ከታሰረበት ሐምሌ 1/2006 ዓ.ም ጀምሮ ከጠበቃው ጋር ከአንድ ጊዜ በላይ መገናኘት ባለመቻሉና ዘመድ እንዲሁም የኃይማኖት አባት

እንዳይጎበኘው በመከልከሉ ነው፡፡

የሽዋስ አሰፋ በባለቤቱ ብቻ በሳምንት አንድ ቀን እንዲጎበኝ የተፈቀደለት ሲሆን የርሃብ አድማ ባደረገባቸው ቀናት ባለቤቱ  ምግብ ስታስገባ ለየሸዋስ ምግቡ እንደደረሰው ተደርጎ ባዶ

ሳህን ሲደርሳት መቆየቱን፣  ባለቤቱ የበዓል ቀን ልትጎበኘው በሄደችበት ወቅት ‹‹ወጥቷል›› ተብላ መመለሷን፣  በማግስቱ ልጆቹን ይዛ ልትጠይቅ ስትሄድም ‹‹ስብሰባ ላይ ናቸው!››

በሚል እንዳታገኘው በመደረጓ ለ15 ቀናት ሳትጠይቀው መቆየቷን ጋዜጣው ዘግቧል።

በሌላ በኩል ጠበቃው ተማም አባ ቡልጉ አቶ የሽዋስን ለማግኘት በተደጋጋሚ  ወደ ማዕከላዊ ቢያቀኑም ሳያገኙት እንደቀሩ ነገረ ኢትዮጵያ ዘግቧል።