ባለፈው ሳምንት በኦሮሚያ የተጀመረው ተቃውሞ ዛሬም ቀጥሎ እንደሚገኝ ተገለጸ

ኢሳት (መስከረም 2 ፥ 2009)

ባለፈው ሳምንት በተለያዩ የኦሮሚያ የክልል ከተሞች ሲካሄድ የቆየው ከቤት ያለመውጣትና የንግድ እንቅስቃሴ የማቆም አድማ ሰኞ ድረስ መቀጠሉን ከሃገር ቤት የተገኘ መረጃ አመልክቷል።

በአምቦና በዙሪያ ባሉ አካባቢዎች እንዲሁም በሻሸመኔ ከተማ ዙሪያ ሲካሄድ የቆየው አድማ ለሰባተኛ ቀን መቀጠሉን ነዋሪዎች በመግለጽ ላይ ናቸው።

በተለያዩ ከተሞች አድማን እያደረጉ ያሉት ነዋሪዎች የመንግስት የጸጥታ ሃይሎች በንጹሃን ሰዎች ላይ የሚፈጸሙትን ድርጊት እንዲያቆሙና በየተሞቹ ያደረጉትን ወታደራዊ ወረራ እንዲያበቁ በመጠየቅ ላይ መሆናቸውን ለመረዳት ተችሏል።

በኦሮሚያና በአማራ ክልሎች በመንግስት የሚፈጸሙ ግድያዎችንና የጅምላ እስራቶችን በመቃወም 14 አለም አቀፍ የሰብዓዊ መብት ተሟጋች ተቋማት የተባበሩት መንግስታት የሰብዓዊ መብት ምክር ቤት እርምጃን እንዲወስዱ መጠየቃቸው ይታወሳል።