በጎንደር የመስቀል በዓል አለመከበሩ ተገለጸ

ኢሳት (መስከረም 17 ፥ 2009)

ከሃምሌ ወር ጀምሮ ህዝባዊ ተቃውሞ በመካሄድ ላይ በሚገኝበት የጎንደር ከተማ ማክሰኞ ሊከበር የነበረው የመስቀል በዓል አከባበር አለመከበሩን የከተማዋ ነዋሪዎች ለኢሳት አስታወቁ።

በዕለቱ የዳመራ የችቦ ማብራት ስነስርዓት አለመከናወኑን የተናገሩት እማኞች በርካታ ነዋሪዎች በዓሉ በሚከበርበት ስፍራ በመሰባሰብ ተቃውሞ አዘል የሆኑ መልዕክቶችን ሲያስተጋቡ እንደነበር ገልጸዋል።

የቪዲዮ መረጃን በማስደገፍ መረጃን ለኢሳት ያደረሱ አካላት የዘንድሮው የመስቀል በዓል አከባበር ከመቼውም ጊዜ በላይ ውጥረትና አለመረጋጋት የታየበት እንደነበር አከለው አስረድተዋል።

የበዓሉ አከባበር በአዲስ አበባና ሌሎች የክልል ከተሞች ተመሳሳይ ድባብ ታይቶበት መዋሉን ከሃገር ቤት የተገኘ መረጃ ያመለክታል።