በወልቃይት ቃብትያ አካባቢ አዲስ ግጭት ተቀሰቀሰ

ኢሳት (ግንቦት 15 ፥ 2008)

ሰሞኑን በትግራይ ክልል ስር በሚገኘው የቃብትያ አካባቢ የሚገኙ የወልቃይት ተወላጆች በክልሉ ላለመተዳደር የወሰዱትን የቃለ መሃላ ውሳኔ ተከትሎ በአካባቢው አዲስ ግጭት ተቀሰቀሰ።

ትላንት እሁድ የወልቃይት ተወላጆች በውሳኔያቸው ዙሪያ ለመምከር በተሰባሰቡ ጊዘ የአካባቢው የጸጥታ ሃይሎች የማስፈራሪያ የተኩስ እርምጃ መውሰዳቸውን እማኞች ለኢሳት ገልጸዋል።

የጸጥታ ሃይሎች በነዋሪዎች ላይ የወሰዱትን እርምጃ ተከትሎም በአካባቢው ትምህርትና የሌሎች የመሰረታዊ አገልግሎቶች መቋረጡን ነዋሪዎች አስታውቀዋል።

በአካባቢው ባሉ የወልቃይት ተወላጆች ላይ የተከፈተውን የተኩስ እርምጃ በመስማት ሌሎች ነዋሪዎች ከአጎራባች ስፍራዎች ቢመጡም የጸጥታ ሃይሎች ወደ ቃብቲያ እንዳይገቡ ማድረጋቸውን እማኞች አስረድተዋል።

ባለፈው ሳምንት በቃብቲያ የሚገኙ የወልቃይት ተወላጆች በትግራይ ክልል ስር አንተዳደርም ሲሉ አዲስ ውሳኔ ማስተላለፋቸው ይታወሳል።

ወደ 4 ሺ ሰዎች በተገኙበት በዚህ የቃለ-መሃላ ስነ-ስርዓት ተወላጆች ባህላቸውንና ታሪካቸውን ጠብቀው በአማራ ክልል ስር ለመተዳደር ፍላጎት እንዳላቸው ለዞኑ አስተዳደር ማስታወቃቸውን ነዋሪዎቹ ለኢሳት አስረድተዋል።

ይሁንና የቃብቲያ አስተዳዳሪዎች በነዋሪዎቹ የተካሄደን ውሳኔ ተከትሎ በወልቃይት ተወላጆች ላይ የቅርብ ክትትልንና ቁጥጥርን እያደረጉ እንደሚገኝ ከነዋሪዎቹ ለመረዳት ተችሏል።

ልዩ ሃይል በአካባቢው ሰፍሮ መሰንበቱን የገለጹት ነዋሪዎች ጉዳዩ የሚመለከተው የፌዴራል መንግስት ችግሩን በድጋሚ እንዲመለከትላቸው ጠይቀዋል።

ሰሞኑን ቃለ-መሃላ ውሳኔን ያስተላለፉት የቃብቲያ ተወላጆች በአሁኑ ወቅት የራሳቸው ኮሚቴ በማቋቋም ራሳቸውን ለማስተዳደርና ከትግራይ ክልል ስር የሚመጣን መመሪያ ላለመቀበል መወሰናቸውም ታውቋል።