በወላይታ ዞን በደረሰ የመሬት መንሸራተት የ41 ሰዎች ህይወት ጠፋ

ኢሳት (ግንቦት 2 ፥ 2008)

በደቡብ ክልል በወላይታ ዞን ኪንዶ ኮሻ ወረዳ በደረሰ የመሬት መንሸራተት በትንሹ 41 ሰዎች ሞቱ።

በዞኑ በሚገኙ አምስት ቀበሌዎች የጣለን ከባድ ዝናብ ተከትሎ በደረሰው በዚሁ የመሬት መንሸራተት አደጋም ወላይታ ከተማን ከዳውሮ ዞን የሚያገናኝ መንገድ ከአገልግሎት ውጭ መሆኑን ፖሊስ አስታውቋል።

በደረሰው የመሬት መንሸራተት ቁጥራቸው ሊታወቅ ያልቻለ ሰዎች የተቀበሩ በመሆኑ የሰዎችን ህይወት ለማትረፍ ፍለጋ እየተካሄደ መሆኑንም ለመረዳት ተችሏል።

ይሁንና፣ በአደጋው መንገዶች ከጥቅም ውጭ በመሆናቸው ምክንያት የነብስ አድን ስራው አስቸጋሪ እንዳደረገው የዞኑ ፖሊስ ለሃገር ውስጥ መገናኛ ብዙሃን ገልጿል።

የሟቾች ቁጥርም ሊጨምር ይችላል የሚል ስጋት መሆኑን ፖሊስ አክሎ አስታውቋል።

ይህ በእንዲህ እንዳለም፣ በባሌ ዞን የጣለን ከባድ ዝናብ ተከትሎ በተከሰተ የጎርፍ አደጋ በትንሹ ዘጠኝ ሰዎች መሞታቸውን የዞኑ ፖሊስ ማክሰኞ አስታውቋል።

በዞኑ ስር በሚገኙ አምስት ወረዳዎች ውስጥ ለሰዓታት የጣለው ይኸው ከባድ ዝናብ ባስከተለው የጎርፍ አደጋም ከ1ሺ የሚበልጡ የቤት እንስሶች መሞታቸውም ተገልጿል።

በተመሳሳይ የጎርፍ አደጋም፣ በምስራቅ ሃረርጌ ዞን ጎርጎቱ ወረዳ በደረሰ የጎርፍ አደጋ የሁለት ታዳጊ ህጻናት ህይወት ማለፉን የዞኑ ሃላፊዎች ለመገናኛ ብዙሃን አስታውቀዋል።

በዞኑ በደረሰ በዚሁ አደጋ ከ11ሺ የሚበልጡ ነዋሪዎች ጉዳት እንደደረሰባቸው ከሃገር ቤት ጉዳት እንደደረሰባቸውም ከሃገር ቤት ከተገኘው መረጃ ለመረዳት ተችሏል።