መድረክ በአዲስ አበባ የተሳካ የተቃውሞ ሰልፍ አካሄደ

ታኀሳስ ፮(ስድት) ቀን ፳፻፯ ዓ/ም ኢሳት ዜና :-የመድረክ የህዝብ ግንኙነት ሃለፊ አቶ ጥላሁን እንዳሻው የገዢው ፓርቲ የጸጥታ ሃይሎች ሲያደርሱት ከነበረው ጫና አንጻር ሲታይ የተሳካ የሚባል ሰላማዊ ሰልፍ መደረጉን ገልጸዋል። መጪው ምርጫ ነጻና ፍትሃዊ እንዲሆን፣ የሰብአዊና ዲሞክራሲያዊ መብቶች እረገጣ እንዲቆም፣ የተለያዩ የፖለቲካ ድርጅት መሪዎች፣ ጋዜጠኞች፣ የሙስሊም የመፍትሄ አፈላላጊ ኮሚቴ አባላት እንዲፈቱ በመፈክሮች መጠየቃቸውን ገልጸዋል።

በሰልፉ ላይ የተወሰኑ የመድረክ መፈክሮች ብቻ እንዲሰሙ አደረጋችሁዋል በሚል ለቀረበላቸው ጥያቄ አቶ ጥላሁን ማንም የራሱን መፈክር እንዳያቀርብ እንዳልተከለከለ እና ህዝቡ መፈክሩን በራሱ መንገድ እያስተካካለ ሲያሰማ እንደነበር ተናግረዋል።